ANONG BAGO SA NETFLIX NGAYONG JANUARY 2018

Happy new year, friends. At para sa bagong taon may mga bago na naman tayong panonoorin sa Netflix. Isama nyo na sila sa listahan ng inyong 'continue watching'.

Series

Glacé January 1

Ops, ops, makatama ka ha!

     Sa French crime drama na ito, isang kahindik-hindik na bagay ang nadiskubre sa mga bundok ng French Pyrenees. Dalawang pulis ang susubukang malaman kung ano ang nangyari at sino ang mga involved.

Comedians in Cars Getting Coffee January 5

Hahaha! Tumatawa ako kase anlayo ng byahe naten, magkakape lang pala tayo!

     Bida rito si Jerry Seinfeld kasama ang iba't-ibang komedyante kung saan nakasakay sila sa isang kotse papunta sa coffee shop at nagkukuwentuhan ng kung anu-ano. Naka 9 na seasons na ito sa ibang istasyon pero ang pangsampu ay sa Netflix ipalalabas.

Babylon Berlin January 30

Papunta silang lahat ng cr, nang may sumigaw ng "barado ang kubeta!"

     Ang taon ay 1929. Isang German detective ang iniimbestigahan ang isang porn ring na pinatatakbo ng mga Russians sa Berlin. Sa panahon ding ito ay unti-unting nagiging makapangyarihan ang Nazi.

Movie

The Polka King January 12

Sino rito ang open-minded. Ikaw na nakagreen?

     Ang komedyanteng si Jack Black ay gaganap bilang si Jan Lewan, isang Polish immigrant na naging King of Pennsylvania Polka. Sa kagustuhang yumaman ay nainvolve siya sa Ponzi scheme or pyramid scam sa atin. Ito ay ibinase sa docu na The Man Who Would Be Polka King na ipalalabas sa parehong araw.

Open House January 19

Ako ang gagamit ng remote, ugh...
Ah, uunahan mo pa ako ha?

     Isang mag-ina ang malalagay sa danger sa bago nilang bahay. Bida si Dylan Minnette ng 13 Reasons Why

A Futile and Stupid Gesture January 26

Kill Will Forte's hair

     Ito ang kuwento kung paano naging matagumpay ang comedy/satire magazine na National Lampoon na nasa ilalim ng henyo pero problemado na si Doug Kenney.

Anime

Devilman Crybaby January 5

Nasobrahan sa tan

Para i-celebrate ang ika-50 years ng career ni Go Sagai, ay ginawang pelikula ang biggest manga hit niya, ang Devilman. Tungkol ito sa teenager na si Akira Fudo na naging si Devilman matapos mapossess ng demon na si Amon.

Documentaries

Rotten January 5

Wala akong kasalanan. Pinadala lang ako ni Colonel!

Isa itong 6-part docu series at itatalakay dito kung paanong niloloko na tayo ng mga higanteng food industries para lang kumita sila ng limpak-limpak.

Dirty Money January 26

E ano ngayon kung marumi? Pera pa rin iyan! Gusto ko pa rin iyan!

Kung ang Rotten ay tungkol sa kalokohan ng food industry, dito naman ay i-eexpose ang mga kabalbalan ng iba't-ibang business sectors.

Ihanda na ang space ng inyong mga phones para idownload ang mga shows na ito!

MGA PROGRAMANG PAMASKO SA NETFLIX

Yes! Pasko na naman! Bigayan na naman ng mga regalo! Kakain na naman tayo ng bibingka, morcon, lechon, paella at fruit salad! At siyempre, family reunion!

May ribbon pa!

Hindi pahuhuli ang Netflix sa selebrasyon dahil meron din syang mga palabas para sa Pasko. Kaya ito, inilista ko ang mga paborito kong Christmas movies na pwede nyong panoorin pantanggal inip habang hinihintay ang Noche Buena.

A CHRISTMAS STORY
Isang bata noong 1940 ang susubukang mapilit ang kanyang mga magulang na regaluhan siya ng Red Ryder BB gun kahit ayaw ng mga ito! Comedy ito at lubhang nakakatawa. Isa sa best Christmas movies of all time.

Hindi nga ako giniginaw. Hindi naman ako makahinga!

ELF
Bida rito ang isa sa favorite comedians ko, si Will Ferrell. Siya si Buddy the Elf, isang taong aksidenteng napunta sa North Pole nung baby pa lang siya. Bumalik siya ng New York upang hanapin ang kanyang tunay na ama.

IT'S A WONDERFUL LIFE
Tatalon na sana mula sa tulay si George Bailey pero napigil siya ng isang anghel at ipina-unawa sa kanya kung ano ang halaga ng kanyang buhay sa pamamagitan ng pagpapakita sa kanya ng kung anong mangyayari kung hindi sya ipinanganak. Ang 1946 classic na ito ay paboritong panoorin sa US tuwing Pasko at pinagbibidahan ng paborito kong si James Stewart.

Kung alam lang ng mga itong wala akong dala.

ARTHUR CHRISTMAS
Isang bata ang hindi nabigyan ng Pamasko dahil sa isang pagkakamali ng mga tauhan ni Santa. At desidido ang anak ni Santa na si Arthur na ayusin ito. Animated ito at tiyak na magugustuhan ng mga bata.

Christmas sweaters. We know you have one

DECK THE HALLS
Away magkapitbahay dahil sa mga Christmas displays ng obsessed na si Buddy na talo pa ang mga bahay sa Policarpio street. Sure na may kilala kayong tulad nila. Bida sina Danny DeVito at Matthew Broderick sa comedy na ito.

Nope. This is not Twins. It's a different movie

THE POLAR EXPRESS
Isang bata ang nagkaroon ng pagkakataon na makasakay sa Polar Express papuntang North Pole para makita si Santa Claus. Ito ay 3D animation na magugustuhan ng mga bata. Kasama rito si Tom Hanks. Hulaan nyo kung sino siya doon.

SCROOGED
Isang salbaheng TV executive ang tuturuan ng leksiyon tungkol sa pakikipagkapwa-tao at sa kahulugan ng Pasko. Kung pamilyar kayo sa kuwentong A Christmas Carol, dun binase ang comedy classic na ito. Bida si Bill Murray na isang comedy god para sa mga Gen-Xers.

CHRISTMAS WITH THE KRANKS
Imbes na magcelebrate ng Pasko sa bahay nila ay nagdesisyon silang magCarribean cruise. Pero di ito nagustuhan ng mga neighbors. At magkakaproblema sila ng tumawag ang kanilang daughter na nasa Peru at sinabing uuwi para magPasko kasama ang kanyang fiancè.

Can't help it. I love Christmas trees!

NATIONAL LAMPOON'S CHRISTMAS VACATION
Kung pamilyar kayo sa Vacation movie franchise, ito ang pangPasko nila. Naghahanda ang Grisworlds family para sa pagdiwang ng Pasko pero as usual puno na naman ng kapalpakan.

MARIAH CAREY'S MERRIEST CHRISTMAS
Christmas special ni Mariah at kakantahin niya ang kanyang mga Christmas hits. Guest si Babyface.

O ayan pili na ng panonoorin para gumanda ang mood para sa Pasko. Or panoorin lahat at magChristmas movie marathon!

ANONG BAGO SA NETFLIX NGAYONG DECEMBER 2017

Ano ba yan? Di pa natin tapos ang sankaterbang mga nasa continue watching list natin, may mga bago na namang palabas sa Netflix. May 34 na mga bagong original series at movies na mapapanood natin ngayong buwan ng Pasko. Narito ang mga gusto kong panoorin

TV Series:

DARK -Dec 1

Di pa masyadong Dark. Alas-singko pa lang ng hapon!

Kung fan ka ng Stranger Things, magugustuhan mo ito. Supernatural din ang tema at may nawawala ring mga bata. Pero di tulad ng palabas nina El, hindi pwede mga bata rito at walang cuteness dito. Ito ang unang made in Germany series ng Netflix, kaya German din ang dialog. Pwede mong iset sa English subtitles or English-dubbed dialog.

THE CROWN (SEASON 2) - Dec 8

Ako ang Super SiReyna

7
Ang pagpapatuloy ng makulay at masalimuot na buhay ng young Queen Elizabeth.

Movies:

MY HAPPY FAMILY -Dec 1

Alis na alis na si Mother

Isang middle-aged woman ang nagdesisyong iwan ang kanyang pamilya at mamuhay mag-isa. At nagkagulo ang kanyang konserbatibo at pakialamerong pamilya sa kanyang aksyon. Bakit niya ginawa iyon? Ang kumain kaya ng cake na walang magbabawal?


BRIGHT - Dec 22

Hindi pwede si Tommy Lee Jones

Pati si Will Smith pinasok na rin ang Netflix. Sa pelikulang ito ay nabubuhay ang mga tao kasama ang mga kakaibang nilalang. Pulis si Will at ang partner niya ay isang orc. Sa isang pambihirang pagkakataon ay kailangan nilang protektahan ang isang elf at isang misteryoso at makapangyarihang bagay.

Docu:

VOYEUR - Dec 1

Ito ang tunay na Kita Kita

Kung ikaw ay isang bosero, tumigil ka na. Baka magulat ka na lang at gawan ka ng docu ng Netflix. Tulad nitong si Gerald Foos na pinanonood ang mga guests ng kanyang hotel na di nila nalalaman.

WORMWOOD -Dec 15

Sandale, nakalimutan ko magpantaloooonnn!!!

Pinaghalong documentary at fiction, isasalaysay dito kung paanong nung 1975 ay gumawa ng experiment ang CIA ng US sa pamamagitan ng LSD para macontrol ang mga tao. Isa sa hinihinalang naging biktima nito na si Frank Olsen ay natagpuang patay.  Kung paanong namatay si Olsen ay tatalakayin din dito.

SEASON 1 EPISODE 1: THE SINNER

Naaalala nyo ba si Jessica Biel? Siya ang gumanap na, pangalawa sa limang magkakapatid na anak ni Reverend Camden sa feel-good family drama na 7th Heaven. Muli siyang nagbabalik sa telebisyon ngayon sa isang crime/psychology drama, ang The Sinner, na mapapanood sa Netflix.

Si Jessica ay si Cora Tanning isang regular young working mother na si di malamang dahilan ay brutal na pinagsasaksak hanggang mapatay ang isang lalaking nagngangalang Frankie Belmont sa beach.  Ang tanging dahilan lang niya ay maingay magpatugtog ang lalaki. Ang humawak ng imbestigasyon ay si Detective Henry Ambrose na ginampanan ni Bill Pullman (siya iyung presidente sa Independence Day).

Sa kanyang pagiimbistiga ay natuklasan niyang maaaring kilala talaga ni Cora si Frankie, dahil ayon sa isang witness ay nakita niya sa mukha ni Frankie na kilala niya ang babae at nagpaubaya itong magpasaksak.

Sa mga memory flashbacks naman ay nakita natin ang mga ilang munting eksena ng kabataan ni Cora. Nung bata siya, sa kanya isinisi ng kanilang madasaling ina kung bakit mahina  at sakitin ang kanyang bunsong kapatid.

Bago matapos ang unang episode ay tinanong ng korte kung ano ang plea ni Cora. Natapos ang eksena na hindi pa sumasagot si Cora kaya sa episode 2 pa natin malalaman.

Natural, panonoorin ko ang susunod dahil nabitin sa plea. Pero kahit nagkaganon sa ending, gusto ko pa ring malaman kung bakit niya pinatay ang lalaki. Mukhang may malalim at masalimuot na dahilan at ito ang magpapanatili ng interes kong panoorin ang buong season ng The Sinner.

SEASON 1 EPISODE 1: MARVEL'S THE PUNISHER

Matapos makipaggulpihan ni Frank "The Punisher" Castle kay Matt "Daredevil" Murdock sa second season ng Daredevil, ngayon ay may sarili nang series ang bayolenteng vigilante.

Sinong susunod?
📷 Entertainment Weekly

Sa unang episode ng Marvel's The Punisher, napatay na niya ang lahat ng mga pinaniniwalaang sangkot sa pagmasaker ng kanyang pamilya. Ngayon ay isa na lang siyang construction worker. Pero may galit pa rin sa kanyang dibdib at ang pagtibag sa mga pader gamit ang maso ang kanyang labasan ng sama ng loob.

Hindi siya nakikisalamuha sa ibang katrabaho at dahil dito ay kinaiinisan siya. Isang baguhan na si Donald ang sumubok na kaibiganin siya.
Isang araw ay nayaya si Donald ng mga katrabaho niya na holdapin ang sugalan ng isang malaking sindikato. Sa malas ay nalaglag ni Donald ang kanyang lisensya at nakita ito ng mga goons.

Dahi dito ay ninais siyang patayin ng mga kasama niya sa panghoholdap. Pero bumalik sa pagka-Punisher si Frank. Niligtas niya si Donald at pinatay ang mga kasama nito. Pinuntahan din niya ang sindikato at niratrat ang mga ito.
Unang episode pa lang ay puno na ng aksiyon kaya't siguradong panonoorin ko ang series na ito. Inaasahan ko na may cameo ang ilan sa mga miyembro ng Defenders, kung hindi ang lahat.

Kung dati dedbol ang niyayari ko, ngayon mga kriminal ang dinededbol ko!

Ang gumaganap na Punisher ay si Jon Bernthal. Maaaring nakilala mo siya sa The Walking Dead bilang si Shane.

SEASON 1 EPISODE 1: ALIAS GRACE

Mahilig ako sa mga period stories. Ang period story ay yaong mga kwento na ang panahon ng kaganapan ay mga unang panahon. Kasama sa kategoryang ito ang bagong series ng Netflix ang Alias Grace. Mula sa pananamit hanggang sa paraan ng pananalita ng mga tauhan ay damang-dama mo ang 19th century Canada. Nalalasahan mo ang hangin ng panahong iyon.

Makikilala natin si Grace Marks, 15 years nang nakakulong dahil sa pagpatay sa dati niyang amo at sa isa pang katulong nito. Ang sinasabing naging accomplice niya na si James McDermott ay binigti. Si Grace ay nakatuwaan ng mga nakatira sa bahay ng prison governor. Kumuha pa sila ng psychiatrist, si Dr. Simon Jordan, para kapanayamin si Grace at pag-aralan kung maaari itong makalaya. Hindi kasi maalala ni Grace kung pinatay nga ba niya ang amo at katulong kahit na may mga pa-unti-unting flashback siya ng mga naganap.

Gusto ko sanang sabihing "I did not kill anybody!", pero parang may nagsabi na nun!

Sa interview din ni Doc Jordan ay na-witness din natin sa isang mahabang backstory kung paanong mula sa Ireland ay napadpad ang pamilya ni Grace sa Canada. Namatay sa barko ang kanyang ina at sinubukan naman siyang halayin ng kanyang ama. Dito ay naisipan na niyang patayin ang ama, di nga lang natuloy. Maaari kayang indikasyon ito na may kakayahan siyang pumatay? Nabanggit din niya ang pangalang Mary Whitney, na nung una ay alyas lang daw nya pero nung lumaon ay isa ring katulong na nakatrabaho niya. Pero sino ba talaga si Mary Whitney?

Napakagaling ng pagganap dito ni Sarah Gadon bilang si Grace. Nagagawa niyang pag-ibahin ang kanyang mukha kapag hinihingi ng eksena tulad ng isang hindi talaga gagawa ng mabuti papunta sa mukha ng hindi makabasag-pinggan.

Naibigan ko rin ang lengguwahe at ang dialog na pag-iisipin ka kung matino ba itong si Grace o may sayad talaga. Sa akin, ang dami niyang sinabi sa isip niya na halatang may tama talaga ang babaing ito.

Kung ipagpapatuloy ko ang panonood nito, ang tugon ko ay oo. Nasasabik na akong malaman kung mailalabas ni Dr. Jordan ang nawawala (o tinatago) na mga memories ni Grace tunngkol sa pagpatay.

ANONG BAGO SA NETFLIX NGAYONG NOVEMBER 2017

Mukhang magiging busy na naman tayong mga Netflix fans dahil andami na namang mga bagong original movies at tv series na ilalabas ngayong November. Kahit na sa totoo lang, e marami pa tayong mga sinusubaybayan na hindi pa natin tapos!

Nood na!

 Mayroong 32 movies and tv shows na sasama sa pila ng inyong Continue Watching list. Ito ang ilan sa mga excited na akong mapanood.

ALIAS GRACE (SERIES) NOV 3

Si Grace ay isang Irish housemaid na nakulong nuong 1843 dahil sa pagpatay sa kanyang amo. Ngunit sinasabi niyang wala siyang naaalalang ginawa niya ito kahit na lahat ng ebidensiya ay nakaturo sa kanya. Isang dekada ang lumipas, isang doktor ang tutulong na maibalik ang memorya niya tungkol sa krimen.

Hindi sila half-sisters

BLAZING TRANSFER STUDENTS (SERIES) NOV 10

Binase sa manga ng parehong titulo ang live-action Japanese seties na ito. Pitong estudyante na iisa ang pangalan ang nagkasama sa iisang eskwela para sa isang misyon. At lahat sila may powers!

JIM AND ANDY: THE GREAT BEYOND (DOCU) NOV 17

Nang gumanap si Jim Carrey bilang ang namayapang komedyante na si Andy Kauffman sa pelikulang The Man On The Moon noong 1999, ay talagang tinularan niya si Andy maging sa likod ng kamera. At ikinasakit ito ng ulo ng mga nakatrabaho niya sa set. Maraming taong itinago ang mga behind-the-scenes footage ng mga pinaggagagawa ni Carrey sa paniniwalang baka makaapekto ito sa pelikula at sa career ni Jim. Ngayon ay ilalabas lahat ito sa isang documentary kasama ng mga interview kina Carrey at iba pang involved sa Kauffman biopic.

MARVEL'S THE PUNISHER (SERIES) NOV 17

Si Jon Berthal ay unang ipinakilala bilang The Punisher sa 2nd season ng Daredevil. Ngayon ang bayolenteng vigilante ay may sarili nang series. Mag-gi-guest kaya ang mga Defenders?

Paparusahan kita. Pero hindi ka magsisisi. Paano pa e, dedo ka na!

MUDBOUND (MOVIE) NOV 17

Dalawang lalaki, isang white at isang black, ang nagbalik sa Mississippi mula sa giyera. Kung akala nila ay tapos na sila sa pakikibaka may mas matindi pa silang laban na bubunuin sa pagpapatuloy ng kanilang normal na buhay.

GODLESS (SERIES) NOV 22

Hinahanap ni Frank, isang outlaw, ang dati niyang partner at ngayo'y kaaway na si Roy. Sa kanilang habulan ay napadpad sila sa La Belle, New Mexico kung saan puro babae ang nakatira.

Ngayong buwan din ang mga bagong seasons ng comedy na Lady Dynamite (Nov 10), ang pinagbibidahang petiod drama ni Jason "Aquaman" Momoa na Frontier (Nov 24), ang resurrection drama na Glitch (Nov 28) at ang huling season ng Western drama na Longmire (Nov 17).

Ihanda na ang mga kukutkutin na tsitsirya. Mahaba-habang panooran na naman ito!

STEPHEN KING SA NETFLIX

Kilala si Stephen King sa pagsulat ng mga nobelang katatakutan at mga psychological thrillers. Marami sa mga gawa niya ay naisalin sa pelikula at telebisyon.

Ngayon pati ang mundo ng Netflix ay pinasok na ni King, ang tinaguriang Master of Horror. Narito ang dalawang orihinal na pelikulang ginawa para sa Netflix na hango sa mga aklat ni King.

GERARD'S GAME

May lumulutang na mga letra at numero sa magkabila ko.

Lumabas ang libro nito noong 1992, at ngayon ay isa na itong made-for-Netflix film na pinagbibidahan nina Carla Gugino (Spy Kids, San Andreas) at Bruce Greenwood (Star Trek, I Robot). Kuwento ito ng mag-asawa na nagbakasyon sa isang lakehouse sa pagnanais na muling gumanda ang kanilang pagsama. At siyempre kasama na rito ang kanilang sexlife. Ngunit nang atakihin sa puso ang lalaki habang ginagawa nila ang isang sex game, naiwan si misis na nakaposas ang mga kamay sa mga poste ng kama. Paano siya makakawala bago siya tuluyang mabaliw?

1922

Okay, nakaposas na ako. Pero kailangan bang nakadagan ka pa sa akin? Huwaw! Anlupet mo tsong!

Ibinase naman ito sa novella ni King na lumabas noong 2010. Dito, isang lalaki ang pumatay sa kanyang asawa. Ngunit ito ay bumalik bilang isang multo at ginulo ang kanyang buhay.

Meron ding iba pang palabas na hango sa mga gawa ni King ang mapapanood sa Netflix. Ito ay ang mga pelikulang  Under the Dome, Secret Window, Christine, Apt Pupil, The Shining, ang two-part mini-series na Bag of Bones at ang series na The Mist.

NETFLIX ORIGINAL:THE BABYSITTER

Dahil Halloween season na naman ay uso muli ang mga pelikulang nakakatakot.  May mga pelikulang tungkol sa mga multo tulad ng Poltergeist at Paranormal Activity. Meron ding tungkol sa mga halimaw gaya ng The Host at Werewolf in Paris. At ang isa pang kategorya ay ang mga slasher movies o iyung ang takot ay gawa ng mga bayolenteng pagpatay dahil sa may sakit sa pag-iisip ang kriminal.

Sa huli maaaring ikategorya ang bagong orihinal na pelikula ng Netflix, ang The Babysitter.

Parang 80's poster!

Makikilala natin dito ang batang laging inaapi sa eskwela na si Colin at ang kanyang magandang yaya na si Bee. Isang gabing wala ang mga magulang niya, natuklasan niyang miyembro ng isang kulto si Yaya at sa mismong bahay nila ginawa ang isang pagpatay bilang bahagi ng kanilang ritwal. Ano ang gagawin ni Colin para mapigil ang grupong ito?

Lugi. Nakatali ako!

Bagama't nakakatakot at bayolente, ito ay isa ring comedy. Para itong more gruesome version ng Home Alone ni Macaulay Culkin. Gugulatin at ka patatawanin. Ang direktor nito ay si McG na nakilala sa pagdirek ng dalawang Charlie's Angels movies. Maaaring hindi natin kilala ang mga gumaganap pero nagawa naman nila ng maayos ang kanilang pagganap.

Maganda ang pelikula at talagang maaaliw lalo na ang mga fans ng mga suspense-thrillers. Isama ito sa inyong Halloween movie marathon.

SEASON 1 EPISODE 1: MINDHUNTER

Nagkaroon pala ng panahon na hindi binibigyang importansiya ang mga aspetong psychological sa pakikitungo sa mga kriminal lalo na yung mga pumatay.  Basta ang alam ng mga pulis ay salbahe ang mga gumawa nito at dapat parusahan.

Ngunit may 2 ahente ng FBI ang nagnais na magkaroon ng mga pag-aaral kung bakit nagagawang pumatay ng mga ito at magamit ang mga matutunan nila na para mahuli sila at para hindi maulit ang mga krimeng ito. Iyan ang kuwento ng MINDHUNTER ang bagong series sa Netflix.

Nice creepy logo

1970s ang panahon ng palabas at ang mga killers na sina Charles Manson at Son of Sam ang laman ng mga balita. Isang FBI negotiator na nagngangalang Holden Ford ang gustong mabago ang lumang sistema ng pagresolba ng mga bayolenteng murder crimes. Nakahanap siya ng kasama kay veteran agent Bill Tench. Pero magawa kaya nilang mapasang-ayon ang ibang otoridad sa kanilang nais na pamamaraan?

Wala pang smartphone, kaya printed picture muna

Ayon sa unang episode na napanood ko, ipagpapatuloy ko ba ang panonood ng Mindhunter? Oo. Bagama't wala pang barilan o habulan na nangyari (at malamang magkakaroon niyon sa mga susunod na episode), ay nakuha naman ng drama nito ang aking atensyon. Kapani-paniwala ang pagganap ng mga aktor lalo na ni Jonathan Groff bilang si Holden.

Panalo rin para sa akin ang paggamit nila ng malalaking letra para ipakilala ang isang lugarna parang style 70s talaga tulad nito.

Siguradong di ka na maliligaw

At ang direktor nito ay si David Fincher na nagdirek ng mga pelikukang patok sa takikya at sa mga kritiko tulad ng Gone Girl at The Curious Case of Benjamin Button.

Si Direk pa ang may close-up

Ang di ko lang gusto ay ang 2 sex scenes na parang di naman kailangan, ngunit nagkaroon dahil required yata na bawat original Netflix series ay may sex scene sa first episode.

Other than that, ang episode 1 ng Mindhunter ay sapat na para naisin kong mapanood pa ang ibang episodes nito.

NETFLIX PARA HINDI MA-OUT OF PLACE

Naranasan mo na bang makipagkuwentuhan sa ang isang grupo at biglang napunta ang usapan sa mga topic na hindi mo naiintindihan? Tulad ng bakit nagpakamatay si Hannah Baker? O iyung may relasyon si Archie at ang kanyang teacher na si Miss Grundy? Bakit Orange ang bagong Black? At sino ang mga Defenders?

Uh... mga friends? Anong channel ba iyan?
📷 cure medical center

Marahil ang mga kaibigan mo ay may Netflix at ikaw wala. E ano ba iyung Netflix?

Ang Netflix ay isang online streaming service. Kung meron kang magandang Internet, pwede ka ng magkaroon ng Netflix.

Anong mapapanood sa Netflix?  Dito ay makapapanood ka ng mga movies at tv shows. Ng legal. Iyung mga pinagkukuwentuhan ng mga kaibigan mo, sa Netflix lang mapapanood. Wala sa tv o sa cable. Dun sumikat ang Netflix, sa mga Original Movies at TV Shows. Maaaring narinig mo na sa mga umpukan o nabasa mo sa diyaryo o sa Facebook ang mga palabas na tulad ng 13 Reasons Why, Stranger Things, The Defenders, Riverdale, Narcos, at Orange is the New Black. Sa Netflix lang meron nun.

Paano ba magkaroon ng Netflix? Kailangan mo lang gumawa ng account. Pwede kang mag-open ng account sa iyong smartphone, computer o tv na may internet. Walang mahabang form na kailangang punuin. Isang email address mo lang at credit card ay meron ka nang Netflix account.

Andami namang palabas 📷digital trends

May 3 packages na pwede mong pagpilian para sa iyong account. Ang 1st package ay 370 pesos. Standard definition lang ang linaw ng mga palabas. At sa isang device ka lang pwede manood (tv, phone, computer, tablet), hindi pwede na may sumabay.

Sa 2nd package na 440 pesos, high definition (HD) na ang linaw ng mga programa. At pwede nang 2 device ang sabay na manood, kahit magkaiba ng palabas.

Ang panghuling package ay 550 pesos. HD din ang mga palabas. At hanggang 4 na device ang pwedeng magsabay-sabay. Kaya pwede nang manood si Nanay ng Star Trek sa TV, si Tatay ng Pretty Little Liars sa tablet, si Ate ng Jerry Before Seinfeld sa kanyang Samsung phone at si Bunso ng Bollywood movies sa computer. Ng sabay-sabay!

Kaya ano pang hinihintay mo? Gumawa na ng Netflix account para pasok ka na sa kwentuhan! (Or hanap ka na lang ng ibang friends!)

ANONG BAGO SA NETFLIX NGAYONG OCTOBER 2017

May mga bago na naman tayong aabangan na mga Netflix Original Shows and Movies ngayong October.

***Tandaan: kapag sinabing Netflix Original, ito ay produced ng Netflix at available sa lahat ng Netflix regions habambuhay (o hanggang may Netflix). May mga shows na mapapanood sa Netflix na hindi nila gawa at ang buhay nito sa Netflix ay sa kung hanggang kailan lang nakasaad sa kontrata. Kung mapagkakasunduan ng Netflix at ng mga producers ng ibang non-Netflix shows ay maaaring ma-renew ang kontrata. Maliwanag?

Buweno, simulan nating himayin kung anong mga bagong palabas ang mapapanood natin sa Netflix.

Suburra (Oct 6) Series
Ito ay isang political drama tungkol sa pagkakaugnay ng organized crime at pulitika sa Rome. Ito ang unang Italian series ng Netflix. May sampung episodes sa unang season nito.

Mindhunter (Oct 13) Series
Tungkol ito sa 2 FBI agents at ang mga kasong hawak nila na kinasasangkutan ng mga psychopaths. Para daw itong Criminal Minds na mas darker ang tono.

Adam Sandler, bida sa The Meyerowitz Stories

The Meyerowitz Stories (Oct 13) Movie
Pang-apat na pelikula na ito ni Adam Sandler sa Netflix. Malalaking artista ang mga kasama niya rito tulad nina Dustin Hoffman, Ben Stiller at Emma Thompson. Sinasabi rin nila na ito ang pinakamaganda sa lahat ng nagawa ni Sandler para sa Netflix.

1922 (Oct 20 ) Movie
Tamang-tama para sa Halloween ang pelikulang ito na halaw sa libro ni Stephen King. Tungkol ito sa confession ng isang lalaki na pumatay sa kanyang asawa at kung paano ito bumalik para guluhin ang buhay niya.

Wheelman (Oct 20) Movie
Isang getaway driver ng isang palpak na bank robbery ang kailangang magtago para sa kanyang safety at ng kanyang dalagitang anak. Kailangan din nyang malaman kung sino ang nagtraydor sa kanya na naging sanhi ng pagkagulo ng kanyang buhay.

Si Eleven, nagbabalik sa Stranger Things Season 2

Stranger Things - Season 2 (Oct 22) Series
Ang 80s-tribute horror series na isa sa biggest hit ng Netflix ay magbabalik. Buo pa rin ang barkada at ngayon ay mahaharap sila sa isang bagong pagsubok na mas matindi pa sa nakalaban nilang Demogorgon nung Season 1.

Ito pa ang ilan sa mga Netflix Originals ngayong October:

Voltron:Legendary Defenders Season 4

Patton Oswalt: Annihilation (Stand-up Comedy Special)

The Day I Met El Chapo: The Kate Del Castillo Story (Docu-series)

Kaya ihanda na ang popcorn at Halloween candies. Hindi na naman tayo mababakante sa mga bagong programa ng Netflix!